Қазақстандық мерген Ислам Сатпаев Шымкентте өтіп жатқан XVI Азия чемпионатында 10 метр қашықтыққа пневматикалық мылтықпен ату (ерлер) жаттығуында алтын медаль иегері атанды.

Шешуші финалдық бәсекеде Сатпаев жоғары дәлдік пен шоғырлануды көрсетіп, мықты қарсыластарынан оза білді. Бұл жаттығуда күміс жүлдені Қытай спортшысы Lu Dingke иеленсе, қола медаль Оңтүстік Кореядан келген Park Hajun-ға бұйырды.

21 тамыздағы жағдай бойынша Қазақстан құрамасы 8 медаль жеңіп алды:
— 1 алтын,
— 1 күміс,
— 6 қола.

Еске сала кетейік, Ислам Сатпаев — Париж-2024 Олимпиадасының қола жүлдегері, ол Алматы қаласын таныстырады.

2025 жылғы 16–30 тамыз аралығында Shymkent Shooting Plaza атқыштар кешенінде XVI Азия чемпионаты өтіп жатыр. Бұл додаға 27 елден 800-ден астам спортшы қатысуда. Турнир мергендік спорт әлеміндегі маңызды оқиғаға айналып, спортшыларға халықаралық аренада өзін көрсетуге тамаша мүмкіндік беріп отыр.