«Астана» олимпиадалық даярлау орталығының спортшысы Мария Бровкова байдарка мен каноэде есуден Әлем чемпионатында қола медаль жеңіп алды. Ескекші каноэде 500 метрге жарысып, аталған қашықтықты 02:09.731 минутта бағындырды.

Бұл жарыста алтын медаль украиналық Людмила Лузанға (2:06.881) бұйырса, екінші орынды Чили елінің спортшысы Мария Миллиард иеленді.

Әлем чемпионаты Өзбекстан елінің Самарқанд қаласында өтіп жатыр. Жалпы саны 20 жүлде сарапқа салынады. Оның 10-ы – байдаркада, қалғаны каноэде есу түрі бойынша.

Еске сала кетсек, қазақстандық Мария Бровкова осыған дейін жасөспірімдер арасында Әлем чемпионы атанған еді. Ескекші қызымызды кезекті жеңісімен құттықтап, бұдан да биік белестерді бағындыруын тілейміз!