20 жастағы Богдан Конченко стенд атумен 9 жылға жуық уақыт бойы шұғылданып келеді. Қазір ол – халықаралық дәрежедегі спорт шебері. Богдан Азия және Қазақстан Республикасының чемпионаттарында талай мәрте жүлдегер атанған. Сонымен қатар, Әлем кубогінде командалық есепте 3-орынға ие болды. Мерген бірнеше рет халықаралық аренада Қазақстанның намысын абыроймен қорғаған.

Богданның басты мақсаты – Олимпиадаға жолдама алып, жеңімпаз атану. Дегеніне жету үшін талмай жаттығуда. Мықтылығын, біліктілігі мен бәсекеге қабілеттілігін арттыру үшін ылғи жарыстарға қатысып, бағын сынайды.

Құралайды көзге атқан мерген спортқа енді қадам басқан жандарға пайдасы тиіп қалар деген ниетте өзінің кеңесімен бөлісті.

«Ең бастысы – төзімді болу керек. Барлық жетістік маңдай тер мен тынымсыз еңбектің арқасында келетінін ұмытпаған абзал. Осы қағидаларды ұстанып, таңдаған спортыңызда үздік атана аласыздар», - деді Богдан.