«МЕНІҢ СПОРТТЫҚ ТАРИХЫМ» АЙДАРЫНДА – ХАЛЫҚАРАЛЫҚ ДӘРЕЖЕДЕГІ СПОРТ ШЕБЕРІ ЛЯН ВИКТОРИЯ

Лян Виктория садақ ату спортына 11 жасында бастаған. Мектепке жаттықтырушылар келіп, оқушыларды садақ атуға үйренуге шақырған. Виктория сыныптастарымен бірге секцияға жазылып, жаңа спортты байқап көруге шешім қабылдайды. Алғашқы кезде жаттығулар біршама бірсарынды көрінгендіктен, көп ұзамай сыныптастарының көбі үйірмені тастап кетеді. Дегенмен Виктория табандылық танытып, жаттығуларын жалғастыра береді.

Шамамен тоғыз ай өткен соң ол өзінің алғашқы жарысына қатысып, жүлделі екінші орынды иеленеді. Бұл жетістік жас спортшыға ерекше шабыт беріп, оның спортқа деген қызығушылығын арттырды. Жеңістің қуанышын сезіну және еңбектің нәтижесін көру Викторияны осы жолда әрі қарай дамуға жігерлендірді. Спортшының айтуынша, дәл сол алғашқы жүлде оның спорттық өміріндегі ең маңызды әрі есте қаларлық сәттердің бірі болып саналады.

Бүгінде Лян Виктория садақ ату спортымен 17 жылдан бері тұрақты түрде айналысып келеді. Осы уақыт ішінде ол үлкен тәжірибе жинақтап, кәсіби деңгейін арттырып, халықаралық дәрежедегі спорт шебері атағына қол жеткізді.

Викторияның пікірінше, садақ атудың ең күрделі тұстарының бірі – психологиялық дайындық. Бұл спорт түрі спортшыдан жоғары зейін қоюды, шыдамдылық пен сабыр сақтауды талап етеді. Себебі жаттығу барысында бірдей қозғалыстар жиі қайталанып отырады, ал әрбір атуда дәлдік пен ішкі тепе-теңдікті сақтау өте маңызды.

Спорттық жолында Виктория төрт жаттықтырушымен жұмыс істеді. Олардың әрқайсысы оның шеберлігін шыңдауға, тәжірибесін арттыруға және спортшы ретінде қалыптасуына өз үлесін қосты. Қазіргі уақытта оның жеке жаттықтырушысы – Бузауов Мурат Сагсызбаевич. Спортшы оның тарапынан әрдайым қолдау мен кәсіби бағыт-бағдар алып отырғанын атап өтеді.

Лян Виктория алдағы Азия ойындарына дайындық жүргізіп жатыр. Сонымен қатар ол 2028 жылы өтетін Олимпиада ойындарына қатысып, жоғары нәтиже көрсетуді мақсат етеді.